|أحمد أمين يسخر من الفنانين: «إزاي واحدة زي هانيا تحب واحد زي محمد فراج»

جي بي سي نيوز-: «إحنا عندنا مشكلة في اختيار الممثلين، اختيار الممثلين ليه أصول، ليه قواعد علمية، ومن أهم القواعد العلمية لاختيار الممثلين إن الكاست (فريق العمل) بيبقى مجموعة من النجوم ومعاهم بيومي فؤاد، ده عمل ناجح»، هي جملة من ضمن ستاند أب كوميدي قدمه الفنان أحمد أمين في افتتاح حفل توزيع جوائز السينما العربية، نجح من خلاله في انتزاع الضحكات من الفنانين، الذي لم يسلم بعضهم من سخريته.

وسخر «أمين» من مسلسل «تحت السيطرة»، خلال فقرته، قائلًا: «في تحت السيطرة، الأستاذة مريم نعوم (الكاتبة) والأستاذ تامر محسن (المخرج) أقنعونا إن عبدالرحمن أبوزهرة ممكن يخلف ظافر العابدين، ما علينا، مش مشكلة، أقنعونا برضه إن جيهان فاضل ومجدي السباعي ممكن يجيبوا هانيا، إحنا ملناش دعوة يعني إحنا مش دكاترة، دي مشاكلهم هما، لكن إن هانيا تحب (محمد) فراج في مسلسل فيه ظافر العابدين وهاني عادل لا نقف واقفة بقى»، مضيفًا موجهًا حديثه لـ«فراج»، الذي جلس ضمن الحضور: «طبعًا الأستاذ فراج ممثل عظيم، لما تقلب التليفزيون تلاقي فراج متعرفش تبطل، مش عشان هو هايل، لا، عشان مفيش تبطيل يا فراج مفيش، أنت فاهم قصدي».

كما سخر الفنان الكوميدي من جائزة الحفل مقارنًا إياها بتمثال حفل الأوسكار قائلًا: «بصراحة تمثال الأوسكار مش عايز أتكلم يعني، يعني تقليدي جدًا الصراحة منظره يقفل، يعني أملس كدة متفهمش لابس ملزق ولا عامل إيه، وبعدين لونه مسروق من عندنا، بصراحة، هتقولي إن هم أقدم أقولك معلش دي درجة لون الفنان تامر هجرس من زمان، خلينا واضحين، وبعدين واقف كدة التناكة الأمريكاني، لكن احنا التمثال بتاعنا بص بقى إمرأة مصرية فلاحة شامخة ترتدي الجلباب وحطة الوشاح بتاع ميس إيجبت هايل، لا وفيه مرونة، في مرونة في التمثال مش في شكله لا في استخدامه، يعني لو مش عايز تحطه في مكتبتك تحطه على السفرة تخرمه يبقى ملاحة، تحفة».